Իջևանի գինու, կոնյակի գործարանը Հայաստանի առաջին գինեգործարաններից է: Հիմնադրվել է 1951 թվականին Տավուշի մարզի Իջևան քաղաքում՝ Աղստև և Սպիտակ ջուր գետերի հովտում։ Իջևանը շրջապատված է լեռներով՝ պատված սաղարթախիտ անտառներով, որոնց տեղ-տեղ փոխարինում են ալպիական մարգագետինները։ Նման բարենպաստ աշխարհագրական դիրքն ու կլիմայական հիասքանչ պայմանները էլ ավելի յուրահատուկ են դարձնում գործարանի արտադրանքը։

2005 թվականին գործարանը ձեռք է բերվել գործարար Է. Լ. Եղիազարյանի կողմից և ենթարկվում է բեկումնային փոփոխությունների: Վերջին տարիներին վարած առավել ճկուն քաղաքականության շնորհիվ հզորացվել է արտադրությունը, բազմապատկվել է գործարանի արտադրանքի տեսականին՝ հասնելով շուրջ երեսուն տեսակի: Մասշտաբային ներդրումներ են կատարվել նաև գործարանի վերանորոգման, նորագույն տեխնոլոգիաների և սարքավորումների ներդրման, խաղողի սեփական այգիների հիմնման, գիտական աստիճան ունեցող և արտասահմանում կրթություն ստացած մասնագետներով համալրման ուղղություններով։ Այս ամենը թույլ է տալիս գործարանին քայլել ժամանակին և գիտությանը համընթաց:

Գործարանը արտադրում է բարձրորակ կոնյակներ, խաղողի և մրգային գինիներ, փրփրուն գինիներ, օղիներ, հյութեր և պահածոների մեծ տեսականի: Գործարանի գինիներից առավել հայտնի են «Մխիթար Գոշ», «Սարգոն», «Իջևան կարմիր», «Իջևան սպիտակ», «Արենի», «Իջևան ընտրովի», «Սափոր» և այլ խաղողի գինիները։